Доктор, дэд профессор С. НАРМАНДАХ: Ардчилсан нийгмийн үнэт зүйлс тодорхой хөрс, суурин дээр биеллээ олдог HC: Сайн байна уу. Хүн Баялаг сэтгүүлийн энэ удаагийн ярилцлагын урилгыг хүлээж авсан танд баярлалаа. С.Н: Баярлалаа. Танай сэтгүүлийн “Хүн баялаг” нэрийг сонсоод эрдэмтэн зохиолч Л.Түдэв гуайн “Нийгмийн эргүүлэг дэх хүн” эрдэм шинжилгээний хурал дээр дэвшүүлсэн санал санаанд бууж байна.

Л.Түдэв гуай хүн эрдэнээ тордож, тойлж эх орныхоо хоймрыг эзэнтэй байлгахын тулд нэгд, хүн ам зүйн цогц дархлаажуулалтыг бий болгон “Хүний тухай хууль”-тай /Англи шиг/ болох, хоёрд, хүн амаа сайн хүнсээр хангаж хүний царай харахгүйгээр дангаараа орших нөхцөлөөр хангах, гуравт, буурал дээдсээс өвлүүлж үлдээсэн эх орон газар шороогоо цөлжих, цөлмүүлэх аюулаас хамгаалахын тулд бүх ард түмний байнгын харуул ажиллуулах зэрэг саналыг дэвшүүлсэн байдаг.