Дээд боловсролыг санхүүжүүлэх, санхүүгийн дэмжлэг үзүүлэхэд хэд хэдэн үндсэн зарчим баримтлахаар хуулийн төсөлд тусгажээ. Дээд боловсролын сургуульд суралцаж байгаа оюутнууд чанартай сургалтыг сонгож, тэгснийхээ үр дүнд өндөр боловсрол эзэмших хэрэгтэй юм. Оюутнуудад зориулсан зээлийн нөхцөл нь хөнгөлөлттэй, нийгмийн үр өгөөжийг дээшлүүлэхэд чиглэгдсэн байх ёстой.

Шинээр боловсруулсан хуулийн төсөлд тусгаснаар их, дээд сургуулийн санхүүжилт нь олон эх үүсвэртэй байх ёстой. Төрөөс тогтоосон шаардлагыг хангасан сургуулийн урсгал зардлын тодорхой хувийг улсын төсвөөс шууд болон, шалгаруулсны үр дүнд санхүүжүүлдэг. Төсвөөс санхүүжих зардлын хэмжээ нь дээд боловсролын сургалтын байгууллагын жилийн нийт орлогын 20 хувиас багагүй байхаар төсөлд тусгасан. Бусад эх үүсвэр нь гэрээт судалгааны ажил, туршилт, зөвлөгөө, сургалтын төлбөр, үйлчилгээний хураамж, эзэмшсэн хувьцааны ногдол ашиг, хандив тусламж, хөрөнгө оруулалтын орлого зэргээс бүрдэхээр зааж өгснөөрөө онцлогтой.

Төрөөс санхүүжилт авч байгаа их, дээд сургуулиуд манайд нэлээдгүй олон бий. Тиймээс эдгээр сургуульд хэд хэдэн шаардлага тавих аж. Тухайлбал, санхүүжилт авах сургууль нь хөрөнгийг үр ашигтай зарцуулах чадавхи, боломжоо илтгэн харуулах ёстой. Үйл ажиллагаандаа чанарын хөндлөнгийн үнэлгээ хийлгэсэн, мөн сургууль төгсөгчдийнх нь ажил эрхлэлт өсөн нэмэгдсэн байх гэх мэт хэд хэдэн асуудал оржээ. Түүнчлэн сургалтын чанарыг дээд боловсролын бусад байгууллагатай харилцан хүлээн зөвшөөрч кредит цагийг тэнцүүлэх, шилжүүлэх, суралцагч болон түүний санхүүгийн боломжийг харгалзан сургалтын төлбөрийг төлөх уян хатан нөхцөлийг сургууль бүрдүүлж өгсөн байх ёстой аж.

Уг хууль батлагдсанаар хэд хэдэн эерэг хандлага ажиглагдах төлөвтэй. Юуны өмнө дээд боловсролын сургалтын байгууллагуудын санхүүжилтийн эх үүсвэр, бие даасан байтал баталгаажиж, үйл ажиллагаанд нь чанарын тогтвортой ахиц гарах аж. Мөн суралцагчид суралцах үндсэн зорилгодоо төвлөрөх, сурлагадаа ахиц гаргах, мэдлэг боловсролыг чанартай эзэмших боломж баталгаажих юм.

О.УРАНТОГОС