Манай улсын хэвлэл мэдээлэл, харилцаа холбоо, боловсрол соёлын салбаруудад мэдэгдэхүйц дэвшлүүд гарч, бид хүссэн үедээ, хүссэн мэдээллээ интернэт, утас, хэвлэл мэдээлэл болон бичгээр, биечлэн гэх мэтчилэн аргуудаар олж авахад харьцангуй хялбар болжээ. Гэсэн хэдий ч, гэрлийн хурдаар нэмэгдэх мэт энэхүү зүйл бүрийн ангилсан, ангилаагүй, чанартай, чанаргүй мэдээ мэдээлэлийг хувь хүн бүр шингээн авч цэгцтэй мэдлэг болгох боломжгүй, зарим тохиолдолд харин ч эсрэгээрээ сөрөг мэдээллийн довтлогоонд өртөн хохирогч болж байна. Ийм учраас мэдээллийг мэдлэг болгон хүлээн авах, мэдээллийг хамгийн хялбар аргаар хэрэгцээтэй хүнд нь хүргэх, мэдээлэл солилцооны хамгийн үр дүнтэй аргуудыг дэлгэрүүлэх нь улам ярвигтай асуудал болж байж мэдэх юм. Ялангуяа байнга мэдээллийн эрэлд гарч байдаг судлаач эрдэмтэд, оюутан залуус, сэтгүүлчдэд олон нийтэд хандсан буюу дотоод хэрэгцээний мэдээллийн бааз, мэдлэг солилцооны ойлгомжтой, цэгцтэй систем байх нь машид үр дүнтэй байж болно.
Мэдлэгээ бусадтай хуваалцах нь өөрийн мэдлэгээ бататган нэмэгдүүлэх, үр дүнд хүрэх шилдэг арга билээ.

И.Одончимэг
www.economicclub.mn