Капитал банк нь өнөөдрийг хүртэл үйл ажиллагаагаа тогтвортой явуулж ирсэн анхны арилжааны банкуудын нэг юм. Тус банк нь үүсэн байгуулагдсанаасаа хойш Монгол Улсын Банкны тухай хууль болон бусад хууль тогтоомжийн дагуу мөнгөн хөрөнгө хуримтлуулан хадгалж, өөрийн нэрийн өмнөөс бусдад зээлдүүлэх, төлбөр тооцооны үйлчилгээ үзүүлэх нийтлэг үйл ажиллагаатай, гишүүдийн хувь нийлүүлсэн арилжааны банк юм.

 Капитал банк нь гадаад харилцаагаа хөгжүүлэхэд анхаарч, харилцагч банкууд болон олон улсын байгууллагуудтай тогтоосон уламжлалт харилцаагаа өргөтгөн, үр өгөөжийг нь дээшлүүлж, банкны үйл ажиллагаанд гүйцэтгэх үүргийг нэмэгдүүлэн, улмаар гадны хөрөнгө оруулалтыг татах, банкаа гадаадад сурталчлах, төрөл бүрийн сургалтанд хамрагдах, шинэ технологи нэвтрүүлэх чиглэлээр тодорхой ажлуудыг зохион байгууллаа. Тус банк өнөөдөр дэлхийн тэргүүлэгч үндэстэн дамнасан банк санхүүгийн байгууллагуудтай идэвхтэй кореспондент харилцаатай ажиллаж байна. Үүнд: АНУ-ын Wachovia Bank, Японы Bank of Tokyo-Mitsubishi UFJ ltd, ХБНГУ-ын Commerzbank AG, ОХУ-ын International Bank for Economic Cooperation, БНСУ-ын Korea Exchange Bank зэрэг олон улсын нэр хүнд бүхий банкуудад ностро данс нээлгэж, улс хоорондын төлбөр тооцоо явуулж байна. Мөн түүнчлэн Citibank N.A, China Construction Bank, Russian Agricultural Bank-тай тус тус хамтын ажиллагаа тогтоож, ностро данс нээх ажлуудыг ойрын хугацаанд гүйцэтгэж дуусгахаар ажиллаж байна. Олон улсын мөнгөн гуйвуулгын брэнд - Coinstar үйлчилгээг Монголд нэвтрүүлж, банк санхүүгийн чиглэлээр хилийн чанадад буй үйлчлүүлэгч нартаа найдвартай түргэн шуурхай үйлчлэн, тэднийг Монгол улстай холбогч гүүр нь болон ажиллаж байна. Мөн Ази Номхон далайн бүс нутаг дахь банк санхүүгийн байгуллагуудтай хамтран ажиллах, зах зээлийг судлах, туршлага солилцох зорилгоор Азийн Банкуудын Холбоонд жинхэнэ гишүүнээр элсэн орж, тус байгууллагаас зохион байгуулдаг бүхий л төрлийн үйл ажиллагаанд идэвхтэй оролцож байна.