Бизнесийн ертөнцийг өөрийн өвөрмөц амжилтаараа бишрүүлдэг Жэк Уэлчийн дурьдатгалтай эх хэлээрээ танилцах боломжийг Монголын уншигчдад “Амжилтын хөтөч төв” олгож байна.
Даяарчлагдан өөрчлөгдөж буй дэлхий ертөнцөд  хэдэн арван жил үнэн зөв гэж ирсэн бизнесийн хуулиуд эрс өөрчлөгдөж, удирдахуйн ухааны цоо шинэ хандлага бий болсныг сүүлийн арван жилийн туршид амжилт ололтоор тэргүүлэгч дэлхийн шилдэг бизнесүүд болон өмнө нь шилдэгт яваад хөгжлийн хурдыг гүйцэхээ больсон ч туршлагатай бизнес нарын жишээнээс харж болно.

АНУ-ын General Electric компани бол зөвхөн Америкийн төдийгүй дэлхийн эдийн засагт ч нөлөөтэй том корпораци билээ. Ийм байгууллагыг жижигхэн бизнес шиг уян хатан, шинэчлэгдэн хувирч байдаг,  өгөөжтэй, амьд мэдрэмжтэй болгон хувиргаж чадсанд Жэк Уэлчийн агуу амжилт оршиж байгаа юм.

Богино хугацаанд олон шинэ өөрчлөлт хийж, хэрэгжүүлж чадсан нь түүний амжилтын нууц. Байгууллагыг байнга шинэчилж, хуучирсан муу бүхнээс цэвэрлэж, шинэлэг, дэвшилтэт бүхнийг бусдаас түрүүлэн нэвтрүүлж  байх хөдөлгөөнт шинж чанартай болгохын төлөө хийсэн түүний өөрчлөлтүүдээс хамгийн гайхалтай нь бүх түвшний менежрийг сургах өөрийн сургалтын төв  байгуулж, тэндээ компанийхаа бизнес кейсийг бүх түвшинд нь хэлэлцүүлж, үр өгөөжтэй байж болох шинэ санаа бүрийг ажил хэрэг болгох талаас нь авч үздэг байсанд оршиж байгаа юм.

Жэк Уэлчийн үед хамгийн  өндөр үнэлэгддэг байсан хүмүүс бол шинийг санаачлагчид. Ямар ч хүнийг хэрхэн үр бүтээлтэй ажиллуулахаа тэр сайн мэддэг нэгэн. Энэ номоос та бизнесээ удирдах гайхалтай шинэлэг санаанууд, удирдагч хүний манлайлах ур чадварын талаарх өвөрмөц жишээг унших болно. Мөн менежментийн баг болон Төлөөлөн удирдах зөвлөлийн үр ашигтай хамтын ажиллагаа, өгөөжтэй засаглалын тогтолцоог эндээс мэдэрнэ.

Ажилдаа зүрх сэтгэлээсээ хандаж, алдаа, онооноос суралцаж явсан түүний намтраас та манлайлал, компанийн засаглал, стратеги төлөвлөлт, менежмент, маркетинг, хүний нөөцийн удирдлагын хамаарлыг хоосон онолоос биш бодит амьдралын хэрэгжилтээс үнэмших боломжтой.