Хяналтын тогтолцоо. Ажлын гүйцэтгэлд тодорхой цаг хугацаанд үнэлгээ хийж байдаг. Энэ нь байгууллагын ажлын өндөр гүйцэтгэл, амжилтыг хангах үндэс болж өгдөг.

Ажлын гүйцэтгэлийн үнэлгээ гэдэг нь ажилтан бүрийн өөрийн үүрэг даалгавараа хэрхэн биелүүлж, ямар үр дүнд хүрч байгаа, түүний ур чадвар, мэргэжлийн бэлтгэл, ажлын ачаалал ямар байгааг дүгнэх үйл явц юм.

Ажлын гүйцэтгэлийн үнэлгээний зорилго:
•    Ажил үүргээ ямар түвшинд гүйцэтгэж байгаа талаар удирдлага ба ажилтнуудад бодит мэдээлэлтэй болгох
•    Сургах хөгжүүлэх хэрэгцээ шаардлага, боломжийг тодорхойлох, хэрэгжүүлэх
•    Цалин хөлс болон нэмэлт цалин урамшуулал олгох, шиийтгэл ногдуулах бодит үндэслэлийг тогтоох
•    Гүйцэтгэлийг сайжруулах

Байгууллагын удирдлагын бодлого, стратеги, соёлоос ажлын гүйцэтгэлийн үнэлгээ, түүний зорилго, шалгуурууд шалтгаалдаг.

-    Ажлын гүйцэтгэлийн үнэлгээ нь хүний нөөцийн менежментийн ажлын шинжилгээ, сонголт, цалин ба шагнал урамшуулал болон сургалттай салшгүй холбоотой.
-    Ажлын гүйцэтгэлийн үнэлгээний шалгуурыг тогтоох үндэс нь ажлын шинжилгээ болдог.
-    Тухайн ажлын байранд ажиллаж байгаа ажилтны гүйцэтгэвэл зохих ажлын тоо хэмжээ, чанарыг тодорхойлохын тулд гүйцэтгэлийн шалгуур буюу стандартыг боловсруулдаг. Энэ нь бодит гүйцэтгэлтэй харьцуулах гол үзүүлэлт болж өгнө.
-    Чадварын стандартууд. Энэ нь тодорхой нэг ажлын байрны шаардлагыг хангахад ажилтанд ямар чадвар хэрэгцээтэй болохыг тусгасан стандартууд юм. Чадвар гэдэг олйголтонд тодорхой үүрэг даалгавар гүйцэтгэх ур чадвар, хүсэл эрмэлзэл болон нэг төрлийн ажлын гүйцтгэлээс нөгөөд шилжих мэдлэг, үр дүн зэргийг багтаадаг.
-    Гүйцэтгэлийн стандартууд. Энэ нь хэдий хэмжээний бүтээгдэхүүн үйлдвэрлэсэн байх эсвэл хэдий хэмжээний борлуулалт хийсэн байх зэргийг тодорхойлсон байдаг.
-    Хувь хүний онцлого. Энэ нь тухайн ажлын байранд чухам ямар хүн тохирох вэ гэсэн нөхцлөөр ажлын онцлогийг тодорхойлох явдал юм.

Ажлын гүйцэтгэлийн үнэлгээг хэн хийдэг вэ?
•    Ажилтан өөрөө
•    Шууд удирдлага
•    Ижил мэргэжил, зэрэглэлийн ажилтан
•    Удирдлагад байгаа ажилтнууд
•    Тусгайлсан ажлын хэсэг
•    Хэрэглэгчид

Байгууллага бүрт ажлыг гүйцэтгэлийг үнэлэх журам, заавар байдаг. Энэ журамд ямар үзүүлэлтээр, хэн , ямар давтамжтайгаар ажлын гүйцэтгэлийг үнэлж байх талаар дэлгэрэнгүй тусгасан байдаг.

    Ер нь ажиллагсадтай өдөр тутам харилцаж, үүрэг даалгавар өгч байдаг ахлагч, менежерүүд ажлын үнэлгээ өгөх нь илүү тохиромжтой бөгөөд ихэнх тохиолдолд бодитой , үнэн зөв байдаг.

Ажлын гүйцэтгэлийн үнэлгээний үйл явц:
1.    Бэлтгэл үе шат. Энэ үе шатанд албан тушаалын категори бүрээр үнэлгээний үзүүлэлтүүд болон шалгуурыг боловсруулах, шаардлагатай илтгэлийн ба үнэлгээний бланк бэлтгэж олшруулж түүнийг бөглөх заавар гаргаж ажиллагчдад танилцуулах, явуулах хугацааг товлон батлуулах, шаардлагатай нөөцийг төлөвлөх, салбар нэгжийн удирдлагуудад зохион байгуулалт арга зүйн зөвлөгөө өгөх зэрэг арга хэмжээг хүний нөөцийн хэлтэс, мэргэжилтнүүд авч хэрэгжүүлнэ. Харин энэ хугацаанд ажиллагчид ажлаа бодитой үнэлүүлэхийн тулд өмнөх үнэлгээнээс хойшхи хугацаанд өөрсдийн хийж гүйцэтгсэн ажлыг цэгцлэн эмхэлж, хийсэн ажлынхаа талаар тайлан бичиж, ирээдүйн ажлаа төлөвлөж, зорилгоо тодорхойлсон байвал зохино.
2.    Үнэлгээний үе шат . Үнэлгээ хийхээр албан ёсоор томилогдсон эрх бүхий хүмүүс ажилтан нэг бүрийн өнгөрсөн хугацаанд хийж гүйцэтгэсэн ажлыг нэг бүрчлэн үзэж шалган, шаардлагатай бол тэдний мэргэжил, мэргэшлийн бэлтгэлийн талаар шалгалт авна. Ажлын гүйцэтгэлийг үнэлэхдээ тухайн ажлын байрны шаардлагыг эсвэл тусгайлан бэлтгэсэн үзүүлэлт, шалгуурыг удирдамж болгоно. Мөн үнэлгээний явцад уг ажилтантай болон түүний шууд удирдлагатай ярилцаж, ажлын гүйцэтгэл болон мэргэжил , мэргэшлийн түвшингийн талаар харилцан ярилцаж санал бодлоо чөлөөтэй солилцож, үр дүнг зөвшилцөн гарын үсэг зурна.
Үнэлгээний явцад болсон бүх үйл явц болон ярилцлагын талаар илтгэх хуудсанд бичнэ. Үнэлгээ бүрэн дууссаны дараа үнэлэгч тухайн ажилтны ажлын гүйцэтгэлийн үнэлгээний дүнг гаргаж дараа шатны удирдлагад танилцуулж эсвэл хамт олны хурлаар хэлэлцүүлж, тэдний санал бодлыг тусган эцэслэн дүгнэлт гаргана.

3. Үнэлгээний дараахь үе шат.    Ажилтаны ажлын гүйцэтгэлийн болон мэргэжлийн түвшингийн үнэлгээний эцсийн үр дүн, дүгнэлтэд тулгуурлан албан тушаал дэвшүүлэх , зэрэг дэв олгох, мэргэжлийн зэрэглэл нэмэгдэх эсвэл буурах, зохих шатны сургалтад хамруулах, цалин хөлсийг өөрчлөх зэрэг арга хэмжээг захиргааны зүгээс авна. Мөн нийтлэг алдаа дутагдлыг хэрхэн сайжруулах талаар зөвлөмж эсвэл холбогдох хүмүүст үүрэг даалгавар өгнө.

Үнэлгээний явц, үр дүнгийн талаар бодитой мэдээллийг ажиллагчдад албан ёсоор өгч байх нь зүйтэй.

Гүйцэтгэлийн үнэлгээний явцад гарч болзошгүй алдаа:
1.    Тогтмол нэг маягийн үнэлгээ өгөх
2.    Хэт зөөлөн хандах
3.    Дундыг барих, төвийг сахих
4.    Нэг шинж дээр тулгуурлах
5.    Сүүлийн сэтгэгдлээр хандах
6.    Хувийн үзэмжээр хандах
7.    Анхны сэтгэгдлээр хандах

Ажлын гүйцэтгэлийн үнэлгээний аргууд
1.    Харьцуулж зэрэгцүүлэх аргууд
2.    Зорилгод тулгуурласан аргууд
3.    Тоон чанарын үнэлгээний аргууд