Шударга өрсөлдөөн хэрэглэгчийн төлөө газраас хэрэглэгчдийн хүсэлтээр дотоодын нефть импортлогчдын үйл ажиллагаанд шалгалт хийж, торгууль ногдуулжээ. Энэ талаараа өчигдөр сэтгүүлчдэд мэдээлэл хийлээ. Өнгөрсөн хугацаанд дотоодын монополь хэдэн компани иргэдийн эрэлт хэрэгцээг далимдуулан шатахууны зохиомол хомсдол үүсгэсэн. Үүнийхээ ачаар шатахуунаа дамлан, багагүй ашиг олсон юм.

Тэгвэл тэднийг Шударга өрсөлдөөн хэрэглэгчийн төлөө газраас “Өрсөлдөөний хууль”-ийн дагуу тус бүрийг нь 10 сая төгрөгөөр торгожээ. Тухайлбал, “Петровис”, “Жаст-Ойл”, “Магнай трейд” зэрэг компанийг торгуулсан гэв. Шударга өрсөлдөөн хэрэглэгчийн төлөө газрын Хууль хяналт зохицуулалтын газрын дарга А.Ариунболд “Эдгээр компани хууль бус үйлдлээ энэ сарын 28-ны өдөр гэхэд таслан зогсоох сануулга өгснийг биелүүлээгүй. Иймд улсын байцаагчийн өгсөн үүрэг даалгаврыг цаг тухайд нь биелүүлээгүй хэмээн үзэж, хэрэглэгчийн эрхийн тухай хууль дахь торгуулийн дээд хэмжээг ногдуулсан” гэлээ.

Эх сурвалж: http://www.mongolnews.mn